Psalms 96
Kari Biya nu King mu ko den
1Wur iru iluwal ale te Kari Biya nup patowaralko!Ali lilim la te Kari Biya ko wur iluwalko!
2Kari Biya ko wur iluwal ale ko nup patowaralko!
Nu anananga saongam mu ko dugu duap tom suen biya kariimet nunga maonalko.
3Noko nup biya, ko sokel, ko dugu duap, ali lilim ko kariimet nunga maonalko.
Ale ura bibiya beteram mu karogo nunga maonal se iki sapomonko.
4Kari Biya mu nup biya nunguningkiri, se nup kualala biya patowanakko.
Ana kaem kawel nunga me nguanganakko,
Kaem Biya ko la nguanganak ale nup patowanakko.
5Ali sor saki nunga kaem mu kaem kawel.
Bare anananga Kaem Biya mu taiti mel suen la nungam.
6Nu king biya nup ago se nikim biya nunguningkiri te bagoso.
Noko kawam kako mu yawarakala, noko nikim, se ko sokel mu naung ningi terong mam aniso.
7Ali sor suen la ko kariimet, Kari Biya nikim sokel karogo se ko nup patowaralko.
8Munan mel gial ago tairal ale ko kawam ningi kasu nagural ale ko nup patowaralko.
9Kari Biya ko munan mu diram nunguningkiri se
nina suen la diram nunguningkiri baga se,
uririkiwa se ko nup patowaralko!
10Sor suen la ko kariimet nunga maonal, “Kari Biya nu king!” mal se ikimonko.
Nu ali sokel ago nungam se gek am aniso,
ale me namuruk tairukko.
Nu maingte se kariimet diram te la nunga tuterukko se.
11Taiti ali, amilmilaralko!
Gagi kelage ale nirung kapar se,
melmasak ka naung ningi mu agotala amilmilomonko.
12Se ningam, nina amilmil beteral se,
na inang ninga naung ningi mu agotala amilmilomonko.
Se giarum ningi mu tam amilmil kelagomon ale nirung betemonko.
13Mu awuk, Kari Biya ali lilim la bituokko taiso.
Nu kariimet munan diram te la nunga tuterukko,
ale munan diram te la nunga bituokko.
Copyright information for
WSK